အညာလေ့လာရေးစင်တာ

မကွေး၊ ၂၀ မတ်လ ၂၀၂၅

စစ်ရေးတင်းမာမှုများကြားက အညာဒေသတွင် လူ့အခွင့်အရေးနည်းပြသင်တန်းတခု အွန်လိုင်းမှကျင်းပနိုင်ခဲ့သည်။ အညာလေ့လာရေးစင်တာနှင့် အမျိုးသားညီညွတ်ရေးအစိုးရ လူ့အခွင့်အရေးဝန်ကြီးဌာနတို့ ပူပေါင်းစီစဉ်ခဲ့ပြီး သင်တန်းကို ၂၀၂၅၊ မတ် ၄ မှ ၁၄ ထိ (၁၁) ကြာ ကျင်းပခဲ့သည်။ လူ့အခွင့်အရေးဆိုင်ရာဝန်ကြီးဌာန၊ ပြည်ထောင်စုဝန်ကြီး ဦးအောင်မျိုးမင်း ဦးဆောင်သော သင်တန်းအဖွဲ့က ယခု (၁၁) ရက်ကြာသင်တန်းတွင် မကွေး၊ စစ်ကိုင်း နှင့် ချင်းဒေသ မြို့နယ် (၁၉) မြို့နယ်မှ သင်တန်းသားများကို လူ့အခွင့်အရေးဆိုင်ရာ အခြေခံသဘောတရားများအပြင် အပြည်ပြည်ဆိုင်ရာလူသားချင်းစာနာမှုဆိုင်ရာဥပဒေ၏ သဘောတရားများကိုလည်း ပို့ချခဲ့သည်။ 

သင်တန်းတွင် လူ့အခွင့်အရေးအကြောင်းအရာများ၊ ဂျဲန်ဒါဆိုင်ရာအကြောင်းအရာများ၊ နိုင်ငံတကာလူသားချင်းစာနာထောက်ထားမှုဥပဒေများကို သင်ကြားခဲ့သည်။ ထို့အပြင် လူ့အခွင့်အရေးသင်တန်းနည်းပြများကိုယ်တိုင် သင်ရိုးညွှန်းတမ်းရေးဆွဲနည်း၊ သင်တန်းတွင်းဆွေးနွေးမှုများတွင် ဆီလျော်ချောမွေ့စေရန် ပံ့ပိုးကူညီဆောင်ရွက်ပေးနိုင်ရေးစွမ်းရည် တိုးတက်စေရေးအတွက် လေ့ကျင့်သင်ကြားပေးခဲ့သည်။ Ah Nyar.  

“ဒီသင်တန်းက အညာတစ်ခွင်က လူ့အခွင့်အရေး၊ လွတ်လပ်မှု နဲ့ လူ့ဂုဏ်သိက္ခာနဲ့ပတ်သတ်တဲ့ လုပ်ငန်းများအပြင် တရားမျှတမှုဆိုင်ရာလုပ်ငန်းများအတွက်ပါ အရေးကြီးတဲ့ လုပ်ဆောင်ချက် တစ်ခု ဖြစ်ပါတယ်။ ပိုမိုကောင်းမွန်တဲ့ အရွေ့တစ်ခုကို ဖော်ဆောင်ဖို့ အရေးပါတဲ့ ခြေလှမ်းတစ်ခုလည်း ဖြစ်ပါတယ်။”

အညာလေ့လာရေးစင်တာ၏ ဥက္ကဋ္ဌ ဗညားတိုးက ပြောသည်။

သင်တန်းကျင်းပနိုင်ရေးအတွက် လုံခြုံရေးစိုးရိမ်မှုများကြားက အင်တာနက်သုံးပြီး ဆောင်ရွက်ခဲ့ရသည်။ သင်တန်းစီစဉ်သူတစ်ဦးဖြစ်သူ ကိုကျော် က “သင်တန်းကို စီစဉ်နေရတဲ့ ကျွန်တော်တို့ကိုယ်တိုင်က ဗုံးခိုကျင်းနားမှာနေပြီး သင်တန်းကို စီစဉ်ခဲ့ရတယ်၊ မကြာခဏ လေယာဉ်တွေနဲ့ လာလာပစ်တတ်တော့ လေယာဉ်သံကြားတာနဲ့ ဗုံးခိုကျင်းထဲ ခဏခဏ ဝင်နေရတယ်၊ သင်တန်းသားတွေလည်း အတူတူပဲ၊ လေယာဉ်ဝဲလာလို ခဏခဏ လုံခြုံတဲ့နေရာ ရှောင်တိမ်းရတဲ့အခြေအနေရှိခဲ့တယ်၊ စစ်ကောင်စီက စစ်ကြောင်းထိုးလို့ ထွက်ပြေးရင်း လိုင်းရတချက် မရတချက် အခြေအနေကနေ သင်တန်းတက်ခဲ့ရတာတွေလည်းရှိတယ်၊ ဘယ်လိုအခြေအနေပဲဖြစ်ခဲ့ ဖြစ်ခဲ့၊ သင်တန်းသားအားလုံးကတော့ သင်တန်းအစကနေ အဆုံးထိ မဆုတ်မနစ်တဲ့ဇွဲလုံလနဲ့ သင်တန်းကို ပြီးဆုံးအောင်တက်ရောက်ခဲ့ကြတယ်၊ တက်တက်ကြွကြွ သင်ယူလေ့လာခဲ့ကြတယ်” ဟု ပြောသည်။

သင်တန်းသူတစ်ဦးဖြစ်သူ နွယ်နွယ်ကလည်း“အခွင့်အရေးနည်းပြသင်တန်းအကြောင်းကို လူငယ်ဆွေးနွေးပွဲတခုကနေရခဲ့တာပါ၊ အဲ့ကနေလျှောက်လိုက်ပြီး အင်တာဗျူးဖြေဖို ရွေးချယ်ခံရတယ်၊ ဒီအထိကျွန်မအနေနဲ့ ထွေထွေထူးထူး စိတ်လှုပ်ရှားမှုမရှိခဲ့ပါဘူး၊ သင်တန်းက လူ့အခွင့်အရေးဝန်ကြီးဌာနနဲ့ ပူးပေါင်းပြီးဆောင်ရွက်မယ်ဆိုတာသိထားပေမယ့် သင်တန်းအစရက်ရောက်မှ ဝန်ကြီးကိုယ်တိုင် သင်ကြားမှာလို သိလိုက်ရတော့ အတော်လေး ရှော့ရသွားပါတယ်၊ ဒါ လုံးဝမမျှော်လင့်ထားတဲ့ကိစ္စပဲ၊ ဆရာအောင်မျိုးမင်းရဲ့ လူ့အခွင့်အရေးလှုပ်ရှားမှုများမှာသူ့ရဲ့ဖြတ်သန်းမှုများက လေးစားဖွယ်ဖြစ်တဲ့အပြင် လက်ရှိမှာလည်း ကျွန်မတိုရဲ့ ပြည်ထောင်စုဝန်ကြီးဖြစ်နေတဲ့အပေါ် သင်တန်းကို အတော်လေး အလေးထားသင်ယူလေ့လာဖြစ်ပါတယ်၊ ဆရာက စေတနာထားပြီး ကျွန်မတိုကို သင်လည်း သင်ပေး၊ ဆူလည်း ဆူပါတယ်၊ ဒါပေမယ့်လည်း တရက်မှ ညည်းငွေ့ရခြင်းမရှိပဲ အသစ် အသစ်သော လူ့အခွင့်အရေးဗဟုသုတတွေ၊ သင်ကြားနည်းစနစ်တွေကို လေ့လာသင်ယူခဲ့ရတယ်၊ အခုဆိုရင် သင်တန်းနည်းပြတယောက်သိသင့်သိထိုက်တဲ့ Facilitation ဆိုင်ရာ အတတ်ပညာတွေ၊ သင်ရိုးညွှန်းတမ်းကို ကိုယ်တိုင်ရေးဆွဲနိုင်တဲ့အထိ လေ့လာသင်ယူနိုင်ခဲ့တယ်” ဟု ပြောကြားသည်။

လူ့အခွင့်အရေး ပြည်ထောင်စုဝန်ကြီး ဦးအောင်မျိုးမင်းသည် စစ်အာဏာရှင်ဆန့်ကျင်ရေးနှင့် လူ့အခွင့်အရေးအခြေအနေတိုးမြှင့်နိုင်ရေးအတွက် မြန်မာနိုင်ငံ၏ အဓိကအခန်းကဏ္ဍတွင် ပါဝင်နေသူဖြစ်သည်။ နှစ်ပေါင်း (၃၀) ကျော်မျှ လူ့အခွင့်အရေးနည်းပြသင်တန်းများ ဖွင့်လှစ်၍ နည်းပြများမွေးထုတ်သင်ကြားပေးခဲ့သည့် အတွေ့အကြုံရှိသူလည်း ဖြစ်သည်။ အမျိုးသားညီညွတ်ရေး လူ့အခွင့်အရေးဝန်ကြီးဌာနသည်လည်း စစ်အာဏာရှင်စနစ်အပြီးတိုင်ချုပ်ငြိမ်းစေရေး၊ လူ့အခွင့်အရေးထွန်းကားရေးနှင့် တရားမျှတမှုရရှိစေရေးအတွက် ကြိုးပမ်းဆောင်ရွက်နေသော ဝန်ကြီးဌာနတစ်ခုဖြစ်သည်။